صبري العيكورة يكتب: الشمار الناقص بِتعِب !
[ad_1]
بقلم / صبري محمد علي (العيكورة)
مقال الخميس الماضي بعنوان [حميدتي سافر وجاء] قلنا فيه في ما قلنا يومها ان زيارة السيد حميدتي لروسيا سيكون لها ما بعدها وقلنا دعونا (نجرب) علاقات خارجية مع (ناس شرق الله البارد) وقلنا كفانا الصلف والابتزاز الامريكي . وقلنا ان نائب رئيس مجلس السيادة ليس لديه منطقة رمادية فى الكلام لذا قال فى مؤتمره الصحفي بمطار الخرطوم (المانع شنو) ان يكون للسودان علاقات مع روسيا وان يكون للروس قاعدة عسكرية بمدينة (بورتسودان) كما لديهم بدولة جيبوتي والنيجر !
(طيب) تعالوا نقرأ الواقع بعد عودة الرجل ، الحصل يا صاحبي بعد زيارة حميدتي (الما عاجبكم ده) وخلال (٤٨) ساعة فقط من عودته زار السودان المبعوث البريطاني للشؤون الافريقية ومبعوث الاتحاد الاوروبي للقرن الافريقي والسبب ؟ أسألني انا !
السبب هو (الشمار الناقص) والشمار الذى يتعب (الجارة) وينكد عيشتها عندما تسمع (ورجغة) فى بيت جيرانها ليلاً ولكنها لم تتبين السبب ! فأول ما ستفعله غداً هو إختراع زيارة صباحية فيما لا يلزم لمحاولة معرفة السبب .
وهذا ما فعله مندوبي بريطانيا والاتحاد الاوروبي ، كل واحد (لفح شبشو) ويا الخرطوم جاك زول . لم يُعلن عن غرض الزيارة . ولكن الموضوع واضح (يا حميدتي الروس قالوا ليك شنو )؟ و (وسوستو قلتو شنو)؟
ذهب بعض المحللين الى ان زيارة السيد النائب قلبت موازين علاقات السودان الخارجية وسحبت البساط من تحت اقدام امريكا و اوروبا لصالح روسيا لذا جاءت هذه الزيارة لمحاولة إعادة المياه الى مجاريها .
طبعاً (يا جماعة) السودان أصبح كاليتيم الغني كلٌ يسعي لتربيته من اجل الاستحواذ على امواله فأمريكا و أوروبا من جهة يقولون جاءوا لمساعدتنا فى احداث التحول الديمقراطي وفك العزلة الدولية و تقديم الدعم الاوروبي (الطلع فالصو) و لكنهم لم يشيروا (للخرت) والاستهبال السياسي الذى مارسوه علينا أيام حمدوك و تعويضات ذوي ضحايا المدمرة (كول) و إفقارهم لنا بأمر البنك الدولي و(إنبطاحة) حمدوك وحكومتيه البائدتين فمن هذه البوابة يتدخل علينا الغرب والاتحاد الاوروبي .
أما البوابة التى فتحها السيد (حميدتوفيتش) مع الروس فهي ما ستوزن معادلة العلاقات السودان الدولية (برأيي) !
قول لى كيف ؟
أقول ليك انا سيتغير الخطاب الغربي و الاوروبي من النمط الاستعلائي وفرض الحلول الفوقية الى خطاب (ابرد شوية) وهذا ظهر جلياً فى اول تصريح للمندوب الاوروبي امس حين قال (ان اوروبا ستبحث حل الازمة السياسية مع اصحاب المصلحة الحقيقية داخل السودان) !
والله (يا مولانا) أصحاب المصلحة الحقيقة ديل فيهم (الكيزان) والحكاية دي بتهيج عليكم (المصران) والكلام ده ما بتقدروا عليه . لا مش كده وبس بل قال ليك وصولاُ لانتخابات حرة ونزيهة ! بالله مش كلام (يضحك) ؟ طيب اليس هذا ما قاله البرهان يوم (٢٥) اكتوبر الماضي ؟ روسيا من جانبها (ما عندها شغله) في من سيحكم ! بل شغلتها فى اين مصلحتها ؟ و(بتعمل نايمه) بعد كده من أى خلافات سياسية داخلية ، لكن عسكرياً الروس عموماً ما (بقصروا معاك) . خردة واللا شغال دي ما مشكلتنا المهم الكلب كان ما عطل الحرامي بصحي ناس البيت . ونحن غايتو صحينا لاهمية وقدسية الجيوش فى حياة الامم .
صحيفة (الديلي تلغراف) البريطانية أعدت تقريراً متزامناً مع الزيارة الهدف منه تحريض السودانيين ضد زيارة روسيا واختارت التوقيت واندلاع الحرب لتقول ان الروس استعدوا للحصار الاقتصادي المتوقع ب (ذهب) السودان المُهرب منذ سنوات ! يعني الكلام ده متين يا (مولانا الخواجة) ! زمن البشير أم زمن حمدوك ؟ الله أعلم ،
لا ومضت الصحيفة فى الكلام (الماياهو) لتقول ان مدير لاحدي كبريات شركات التنقيب فى السودان (لم تذكر اسمه ولا اسم الشركة) اخبرها ان الروس لاعبين اساسيين فى قطاع التنقيب فى السودان !
(طيب) أين المشكلة ؟ ابحثوا عن الاتفاقيات و ستعرفوا ارقام المربعات التى سمح للروس بالتنقيب فيها كسائر الشركات الاجنبية . ثم ذكرت الصحيفة انه لا توجد إحصائية سودانية توضح أن هناك صادر ذهب لروسيا ! شفتو جنس اللولوه دي ؟ ( والله ماشفتا لكن جابو ليّ) !
قبل ما أنسي : ــــ
قطعا هناك إعادة ترتيب امريكية اوروبية تجري لعلاقاتها مع السودان . والسبب (كُلللو) منك يا حميدي ياخ ما كان فى داعي تديهم (الجوكر) بايظ !
[ad_2]
مصدر الخبر موقع الانتباهه
المزيد من الاخبار على الرابط بالاسفل
https://sudanewsnow.com/?p=196316
اخبار السودان الان من كل المصادر
صحيفة الانتباهة
ليست هناك تعليقات:
إرسال تعليق