صبري العيكورة يكتب: يا جبريل (السلخ) لن يبني إقتصادا

صبري العيكورة يكتب: يا جبريل (السلخ) لن يبني إقتصادا
[ad_1]

بقلم . صبري محمد علي (العيكورة)

حالة التخبط التى تعيشها (عمتنا) الحكومة لم تعد خافية على احد وهذا نتاج طبيعي لحكومة تسير بلا رأس و وزراء تائهين وبرلمان غائب لذا من الطبيعي ان يجد الوزراء انفسهم كما الايتام

كل يوم قرار جديد وقبل ان يصبح فجر اليوم التالي يلغي هذا القرار .لم يفيق الشعب عن صدمة زيادة سعر الكهرباء الا و (ردموه) بزيادة الوقود ! ولم يلتقط انفاسه الا فاجأته حكومتنا العرجاء بزيادة تكلفة العلاج ! لم يتمم الحوقلة الا وفاجأته بالامس بزيادة غاز الطبخ بنسبة ١٥٠% .

الحكاية تاخد ليها (صنة كده) يطلع مش عارف عضو المجلس السيادي فلان الفلاني يقول ليك تم الغاء الزيادة او تجميدها لاخضاعها لمزيد من الدراسة مع الشركاء ! طيب لزوم (العواسة) شنو ؟ ما تتفقوا بالاول وبعدين تعلنوها وعمك جبريل (لاااابد) وهو سبب المصائب دي كلها ! (قول لى كيف)؟

اقول ليك انا …
تعرف ياصاحبي كلما جاءه وزير مكلف طلب ليهو قرشين تلاته يقول ليه ما عندي امش اتصرف ! والوزير طبعا ما عنده غير محمد احمد المسكين يفرض عليه الحاجة العاوزها . ولما كانت الحكومة الحالية تعيش وسط جزر معزولة (وييين) لمن يسمع مجلس السيادة ان الوزير الفلاني زاد الرسوم الفلانية ! يا اخونا اقسم بالله نحن لمن كنا فى اتحادات الطلبة بالجامعات ما عملنا عملياتكم (الجهلولة) دي !

يا اخوانا جهجهتو الشعب (كل يوم عكاز جديد) ! يعني هسي الواحد ما عارف زادت تكلفة العلاج ام لا ؟ يعني بالبلدي كده الزول يمرض واللا ينتظر شوية لمن تنتهي حكاية

(اخضاعها لمزيد من الدراسة بتاعتكم دي) .

يا جبريل (على الطلاق) بعد ده إلا الناس يبيعوا ليكم هدومهم اللابسنها انبوبة الغاز (٣٢٠٠) جنية و ده سعر المصفاة خلى بالك يعني لسه فى تماسيح الانس والجن منتظرين حقهم فى انبوبتك دي ! ما تقول لى ديل ناس الطاقة لو وفرت ليهم ميزانيتهم لما فعلوا ذلك . بالله هو العصر الحجري ده كيفنو ؟ ما رجعتو الناس لما قبل العصر الفحمي و الحطبي !

وكمان جابت ليها زيادة كلفة علاج ؟ و يجيك وزير المالية بلا خجلة يقول ان وزارته تدعم عمليات القلب المفتوح ب (١١٧) مليون جنية ! ياخ الناس لاقية بندول؟ لا و المصيبة لمن يكون مثل هذا التصريح متزامن مع الاعلان عن زيادة تكلفة العلاج يعني بذكرونا بافضالهم علينا وكده وعلينا ان نحمد الله
ونسكت اليس هذا هو المطلوب من الشعب ؟

كمان تكررت حكاية (ينط لينا) احد اعضاء المجلس السيادي من المدنيين يعمل فيها قلبو علينا يقول ليك ما تزعلوا يا جماعة خلاس الحكاية دي جمدناها ! ياخي انتو تجمدوا شنو و تسخنوا شنو ياخ ؟

حكومة ماشة بكفرين وبلا مكنة فماذا تتوقع منها؟ اين رئيس الوزراء ؟ اربعة شهور يا جماعة حرام عليكم !

(برأيي) سيظل هذا التخبط طالما ظل المجلس السيادي بهذه السلحفائية وسيظل الوزير المكلف يقدم رجل ويؤخر الاخريك امام اي قرار مصيري . و فى ظل حالة اللا انتاج و غياب مستشارين متخصصين فلا اتوقع ان نتقدم خطوة الى الامام

وطالما ان السيد جبريل قاعد متحكر و متحكم فى (جردل اللقيمات) فلا اري انفراجا قريبا .

و ما اذكر به هو يجب ان لا يتحمل المواطن تقاعس المجتمع الدولي عن دعم سلام (جوبا) حتى يتجه السيد جبريل لسلخ المواطن و تجويعه على حساب سلام لم يستوفي ادني مقوماته سوي حفلة (ندي القلعة) .

و على الحكومة و البرهان شخصيا ان يلتفت لما يفعله الوزراء بالمواطن فلم يعد الكلام يؤكل عيشا ولم تعد الوعود تقنع طفلا ولم يتبقى لانسان السودان سوي هيكله العظمي .

الرئيس نميري اسقطته زيادة سلعة السكر . فاختاروا انتم باي سلعة سيسقطكم الشعب ! الرغيف ام السكر ام الغاز ام الدواء ام المحروقات ام ماذا.. اختاروا بانفسكم .

قبل ما انسي : —-
وقبل ان اختم هذا المقال بلغني ان الطاقة الغت قرار زيادة الغاز ! يا اخونا ده كلام شنو ده . نشتري الفحم واللا ما نشتريهو ؟ نمشي للدكاترة واللا نصبر شوية ؟

اللهم طولك يارووووح !

[ad_2]

مصدر الخبر موقع الانتباهه

المزيد من الاخبار على الرابط بالاسفل
https://sudanewsnow.com/?p=193907
‏اخبار السودان الان من كل المصادر‏
صحيفة الانتباهة